Бұл жұмыста оң жағында интегралдық мүшесінде ізделінді функцияның туындысы қатысқан импульсті шеттік шартты параметрлі интегралдық - дифференциалдық теңдеулер жүйесінің шешімін анықтаудың дербес бір жағдайы қарастырылған.Ол үшін, туындысы қатысқан мүшесін бөліктеп интегралдау арқылы есеп импульсті шеттік шартты параметрлі жүктелген интегралдық-дифференциалдық теңдеулер жүйесіне келтірілген. Әрі қарай, жаңа параметрлерді енгізу арқылы, әрі сол параметрлердің негізінде жаңа айнымалыларға көшу арқылы есеп эквивалентті есепке келтіріледі. Жаңа айнымалыларға көшу арқылы, теңдеу үшін бастапқы шарттар алынады. Соның негізінде есепті шешу арнайы Коши есебі мен сызықтық теңдеулер жүйесін шешуге келтіріледі. Дифференциалдық теңдеудің бас бөлігінің фундаментальді матрицасын пайдаланып, Коши есебінен Вольтерра тектес интегралдық теңдеу алынады. Біртіндеп жуықтау әдісі арқылы алынған интегралдық теңдеудің жалғыз шешімі анықталады. Соның негізінде арнайы Коши есебінің шешімі табылып, шеттік шарттарға қойылады. Шыққан сызықтық теңдеулер жүйесінің шешімділігі негізінде, бастапқы есептің бірмәнді шешімділігінің қажетті және жеткілікті шарттары алынған.