Мақалада толығымен дерлік кальциттен тұратын карбонат үлгілерінің еруі нәтижесінде олардың кеуек құрылымының өзгеруі зерттеледі. Осы мақсатта 12% және 18% тұз қышқылы ерітінділерін айдау бойынша зертханалық тәжірибелер кезінде сыналған 4 (I, II, III және IV) цилиндрлік карбонатты үлгілерден 8 текше тәріздес шағын үлгілер (№1-8) таңдалды. Қышқыл ерітінділері сәйкесінше 4 және 8 мл/мин ағын жылдамдығымен айдалды. Шағын үлгілердің кеуек құрылымы, дәлдігі ~19 мкм болатын рентгендік томографиялық кескіндер негізінде Avizo бағдарламалық пакетін пайдалану арқылы алынды. Шағын үлгілердің сипаттамалары су ағынын кеуекті масштабта модельдеу арқылы есептелді. Кеуек құрылымындағы елеулі өзгеріс бастапқы кеуектілігі төмен (8,7%) болатын №3 шағын үлгіде орын алды, ал оның өткізгіштігі бастапқы мәніне қарағанда 65 есеге артты. Орташа кеуек және жұтқыншақ радиустары 10%-дан астам ұлғаюы байқалған №1, 3 және 4 шағын үлгілерде өткізгіштіктің айтарлықтай жоғарылағаны (2,5-65 есе) байқалды. Керісінше, №2 шағын үлгінің орташа кеуек мен жұтқыншақ радиустарының ~3% өзгеруі оның өткізгіштігінің 25%-ға ғана артуына әкелді. Тау жыныстарының еруі кеуек өлшемінің таралуына айтарлықтай әсер етті. Бұл зерттеудің нәтижелері қышқыл ерітінділерін айдау арқылы ұңғымаға мұнай ағынын ынталандыру кезінде қабаттың өткізгіштігінің жоғарылауын және СО₂ айдау кезінде карбонатты жыныс қабаттарының сыйымдылығы мен тасымалдау қабілетін бағалау үшін пайдалы болуы мүмкін.