Бұл жұмыста білім беруді ақпараттандыру жағдайында болашақ математика мұғалімдерін компьютерлік графика және мультимедиа пәндерінен оқытудың ерекшеліктерін зерттеуге және олардың математикалық дайындығын жетілдірудің тиімділігіне әсер ететін маңызды аспектілерді анықтау жолдары қарастырылды. Бүгінгі таңда әртүрлі бағдарламалық қосымшалардың пакеттерінің көптігіне қарамастан, компьютерлік анимацияны үйрену мәселесі өзекті болып қала береді. Оқу жүйелерінде компьютерлік графиканы қолдану ақпарат беру жылдамдығын арттыруға және оны түсіну деңгейін жоғарылатуға мүмкіндік беріп қана қоймай, қиялды ойлаудың дамуына да ықпал етеді. Графикалық кескіндердің түсі қиялды қоздыратын ойлар мен сезімдерге әсер ететіндігі тәрбиелік және психологиялық тұрғыдан маңызды. Компьютерлік графика технологиясын сауатты пайдалану оқу материалын жақсы игеруді қамтамасыз етіп қана қоймай, сонымен бірге оқу процесінің тиімділігі үшін барлық жағдайларды жасауға мүмкіндік береді.