Мектеп жасына дейінгі балалардың сөйлеу қабілетінің нашарлауы қоғамдағы күрделі мәселеге айналды. Арнайы орталықтар мен мамандарға жүгінетін ата-аналардың саны жылдан жылға артып келеді. Бұл мәселені шешу үшін біз табиғи тілді өңдеу және машиналық оқыту әдістерін қолдана отырып, қазақ тілінде жаңа технологияларды жасай аламыз. Осы саланың ақпараттық ағымына қосылып, жаңа технологиялармен жұмыс жасау баланың дамуында нәтижелілікке қол жеткізуге ықпал ететіні анық. Сондықтан сөйлеуді түзету саласында ақпараттық жүйені құрудың маңызы артып келеді.

Мақалада сөйлеу қабілеті нашар балаларға қазақ тілін оқыту жүйесін құру әдістемесі, соның ішінде осы жүйеге қосылған қазақ тілінің синонимдер сөздігі қарастырылған. Синонимдер сөздігі баланың деңгейіне қарай сөздік қорын молайта отырып, дұрыс және ана тілінде сөйлеу дағдыларын дамытуға бағытталған. Ұсынылып отырған тәсілдің жаңалығы қазақ тіліндегі мәтіндердегі мағыналық жағынан ұқсас сөздерді анықтауында. Бұл жұмыс логопедия саласындағы жаңа педагогикалық жүйені автоматтандыруға көмектеседі.