Аңдатпа

Соңғы жылдары жасанды интеллект (ЖИ) технологиялары білім беру үдерісінің ажырамас бөлігіне айналып, студенттерге оқу мен өзін-өзі дамыту үшін жаңа мүмкіндіктер ұсынуда. Студенттер арасында ЖИ бағдарламаларының танымал болуы оқу материалдарына қолжетімділікті жеңілдетуімен, рутиналық тапсырмаларды автоматтандыруымен және оқу үдерісін жекелендіруімен түсіндіріледі. Бұл мақалада ChatGPT, Grammarly, Quizlet, Canva және Duolingo сияқты студенттер арасында кеңінен қолданылатын ең танымал ЖИ құралдарына талдау жасалған. Бұл бағдарламалар эссе жазу, емтиханға дайындалу, шет тілдерін үйрену және мультимедиялық контент жасау үшін белсенді түрде пайдаланылады. Зерттеу барысында студенттер жиі таңдайтын бағдарламалар, олардың негізгі функциялары, артықшылықтары мен шектеулері қарастырылды. Зерттеу нәтижелері ЖИ бағдарламаларының оқу тиімділігіне қалай әсер ететінін және оларды білім беру саласында одан әрі қолдану перспективаларын анықтауға мүмкіндік береді.