Аңдатпа

Қазіргі цифрлық дәуірде көптеген елдер білім беру жүйесіне жасанды интеллекттің негіздерін кеңінен енгізуде. Дегенмен, қазақстандық мектептердің 10–11 сыныптарына арналған информатика пәнінің оқу бағдарламасында жасанды интеллект тақырыбына небәрі 16 сағат бөлінген. Бұл уақыт көлемі теория мен практиканың тиімді интеграциясына жеткіліксіз. Соның салдарынан оқушылардың практикалық дағдылары үстірт қалыптасады. Қазіргі таңда осы тақырып бойынша орындалатын практикалық тапсырмалар тек кестелік процессор (Excel) құралдарын пайдаланумен ғана шектелген. Мұндай шектеу оқушылардың жасанды интеллекттің заманауи құралдарын меңгеруін тежейді. Сөйтіп, мектеп бітірушілер заман талабына сай жасанды интеллект саласындағы негізгі білім мен дағдыларды толыққанды игермей шығады. Осы аталған кемшіліктерді жою үшін мектепте жасанды интеллектті оқытудың теориясы мен практикасын тығыз ұштастыратын жаңа педагогикалық тәсіл қажет. Зерттеудің негізі жасанды интеллектті оқытуда теория мен практиканы үйлесімді ұштастыратын және әлемдік озық тәжірибелерге сай келетін концептуалды педагогикалық модельді әзірлеу болып табылады.