Дербес туындылы теңдеулердің көбінің шешімдері  қатарлар немесе интегралдар түрінде болады. Сондықтан шешімдерді бастапқы, шекаралық және шеттік шарттардан алынған сандық мәліметтер  арқылы құрылған  есептеу агрегаттарымен  жуықтау (дискреттеу)  есебі қойылады. Бұл жұмыста «Компьютерлік (есептеуіш) диаметр» деген атауға ие қойылым аясында жылуөткізгіштік  теңдеуінің шешімдерін  көпөлшемді периодты Соболев класына тиесілі бастапқы шарттардан алынған ақырлы көлемдегі сандық мәліметтер бойынша дискреттеу есебі қарастырылған. Дәл айтқанда, сандық мәлімет ретінде Соболев класының сызықтық  қабықшасында анықталған сызықтық функционалдар қарастырылғанда, біріншіден, Лебег кеңістігі метрикасында оптималды дискреттеу қателігінің дәл реті анықталған; екіншіден, оптималды есептеу агрегатының  шектік қателігі табылған; үшіншіден, бастапқы шарттың тригонометриялық Фурье коэффициентері бойынша  құрылған кез келген есептеу агрегатының шектік қателігін  (реті бойынша)  жақсартуға болмайтыны дәлелденген.