Сызықтық емес тербелістер теориясында жиілігі өлшемдес емес бірнеше тербелістердің қабаттасып келуі нәтижесінде пайда болатын шартты-периодты тербелістермен жиі кездесуге тура келеді. Осындай резонанстық жағдайдағы квазисызықтық жүйенің шартты-периодты шешімін табу үдерісі «кішкене бөлім» мәселесін туындатады. Бұл мәселе шешімнің бар болуын дәлелдеу мен оны құру есебін қиындата түседі. Біздің ұсынып отырған мақаламызда В.И. Арнольдтың, И. Мозердің және басқа да зерттеушілердің жұмыстары негізінде екінші ретті бір критикалық жағдайдағы квазисызықтық дифференциалдық жүйенің шартты-периодты шешімінің бар болатындығы дәлелденіп, оны құру жолы көрсетіледі. Шешімді құру барысындағы жуықтау тізбегі Н.Н. Боголюбов, Ю.А. Митропольский, А.М. Самойленколар ұсынған үдемелі жинақтылық әдіске сүйеніп берілді. Жұмыстың нәтижесін нақты дифференциалдық жүйелердің шарттыпериодты шешімдерін құру үшін пайдалануға болады.