Бұл мақалада мектеп курсындағы иррационал теңдеулер мен теңсіздіктерді шешу кезінде деңгейлік саралап оқыту әдістемесін қолдануға назар аударылады. Жалпы сыныпта дамуы мен дайындық деңгейі, үлгерімі және оқуға деген көзқарасы, қызығушылығы мен қабылдауы әртүрлі оқушылар бар. Мұғалім дәстүрлі оқытуды ұйымдастыру кезінде түрлі қиындықтарға тап болады. Сондықтан оқушылардың бір деңгейде қалып қоймай, керісінше оқушының деңгейі көтеріліп, пәнге деген қызығушылығы артуы үшін деңгейлік саралауды қолдану қажет. Мектеп математика курсында иррационалдық теңдеулер мен теңсіздіктерді шешу күрделі тақырыптардың бірі. Мақала кіріспесінде деңгейлеп саралап оқытудың анықтамасы мен бөлінген үш деңгей жайлы сөз қозғалады. Ары қарай иррационал теңдеулер мен теңсіздіктерге арналған есептердің жалпылама шығарылу жолына тоқталып, деңгейлеп саралау әдісі бойынша иррационал теңдеулер мен теңсіздіктер есептері бөлініп, олардың шешу жолдары талданып жазылды.